ಮದ್ರಸಾ ಅಧ್ಯಾಪಕರು ಜಮಾಅತ್ ಕಮಿಟಿಯವರ ಸೇವೆ ಮಾಡಬೇಕಾದವರಲ್ಲ. ಅವರನ್ನು ಸೇವೆಯಿಂದ ತೆಗೆಯುವಾಗ ಸೌಜನ್ಯದಿಂದ ವರ್ತಿಸಿರಿ.

ಮದ್ರಸಾ ಅಧ್ಯಾಪಕರು ಜಮಾಅತ್ ಕಮಿಟಿಯವರ ಸೇವೆ ಮಾಡಬೇಕಾದವರಲ್ಲ.
ಅವರನ್ನು ಸೇವೆಯಿಂದ ತೆಗೆಯುವಾಗ  ಸೌಜನ್ಯದಿಂದ ವರ್ತಿಸಿರಿ.

ಮಕ್ಕಳಿಗೆ ಮೌಲ್ಯಾಧಾರಿತ ಶಿಕ್ಷಣ , ಧಾರ್ಮಿಕ ಪ್ರಜ್ಞೆ , ಸಂಸ್ಕೃತಿಯನ್ನು ಕಲಿಸಿಕೊಡುವಲ್ಲಿ ಮದ್ರಸಾ ಅಧ್ಯಾಪಕರ ಸೇವೆ ಅನನ್ಯವಾದದ್ದು. ಹಿರಿಯರೊಂದಿಗೆ ಗೌರವ ತೋರಿಸಲು ,ಕಿರಿಯರೊಂದಿಗೆ ಪ್ರೀತಿಸಲು ಕಲಿಸಿಕೊಟ್ಟು ಎಳೆಯ ಮಕ್ಕಳ ಮನಸ್ಸಿನಲ್ಲಿ ಮಾನವೀಯ ಮೌಲ್ಯವನ್ನು ಬಿತ್ತರಿಸಲು  ಮದ್ರಸಾದಲ್ಲಿ ಕೆಲವೊಮ್ಮೆ ಅಧ್ಯಾಪಕರು ಪಡುವ ಕಷ್ಟ ,ತ್ಯಾಗ ವರ್ಣನಾತೀತವಾದದ್ದು.

ಕೆಲವೊಂದು ಕಡೆ ಕೆಲ ಅಧ್ಯಾಪಕರು ಮಾಡುವ ತಪ್ಪುಗಳ ಹೆಸರಿನಲ್ಲಿ ಇಡೀ ಅಧ್ಯಾಪಕ ಸಮೂಹವನ್ನೇ ತಪ್ಪಿತಸ್ಥರ ಸಾಲಿನಲ್ಲಿ ನಿಲ್ಲಿಸುವ ಜನರಿಗೂ ಇಲ್ಲಿ ಕಡಿಮೆಯೇನಿಲ್ಲ.

ಹಲವು ವೈಶಿಷ್ಟ್ಯವನ್ನು ಹೊಂದಿರುವುದರ ಮೂಲಕ ,ಪುಣ್ಯದಾಯಕ ತಿಂಗಳಾಗಿ ಗುರುತಿಸಲ್ಪಡುವ ರಂಝಾನ್ ಆಗತವಾಗುವಾಗ ಕೆಲವೊಂದು ಜಮಾಅತ್ ಕಮಿಟಿಗಳಿಗೆ ಅದೇನು ಆಗುತ್ತೋ ಅಂತ  ಅರ್ಥವಾಗುವುದೇ ಇಲ್ಲ. ಊರಿನಲ್ಲಿ ಮಕ್ಕಳಿಗೆ ಧಾರ್ಮಿಕ ವಿದ್ಯಾಭ್ಯಾಸವನ್ನು ನೀಡುವ ಉಸ್ತಾದರ‌ನ್ನು ಕಾರಣಗಳಿಲ್ಲದೆ ಬಿಟ್ಟು ಬಿಡುವುದು..!!
ಒಂದು ವೇಳೆ ಕಾರಣಗಳನ್ನು ಪ್ರಶ್ನಿಸಿದರೆ ಕೆಲವೊಮ್ಮೆ ಹಾರಿಕೆಯ ಉತ್ತರಗಳಾಗಿದ್ದರೆ ,ಇನ್ನು ಕೆಲವೊಮ್ಮೆ ಇಲ್ಲ ಸಲ್ಲದ ಆರೋಪಗಳನ್ನು ಅವರಿಗೆ ಬೋನಸ್ ಆಗಿ ನೀಡುವುದರ ಮೂಲಕವಾಗಿದೆ ಅವರನ್ನು ಸೇವೆಯಿಂದ ವಜಾ ಗೊಳಿಸುವುದು..!!

ಒಂದು ಜಮಾಅತ್ ಅಧ್ಯಕ್ಷರು ಅಂದರೆ ಅವರಿಗೆ ಆ ಜಮಾಅತ್ ವ್ಯಾಪ್ತಿಯಲ್ಲಿ ಬರುವ ಪ್ರತಿಯೊಂದು ಮನೆಗಳ ಮೇಲೂ ಹೊಣೆಗಾರಿಕೆಯಿರುತ್ತದೆ.
ಮಸೀದಿಯ ಅಧ್ಯಕ್ಷ ಅನ್ನುವ ಪದವಿಗೂ ಒಂದು ಘನತೆಯಿರುತ್ತದೆ.
ನಾಳೆ ಪಾರತ್ರಿಕ ಲೋಕದಲ್ಲಿ ಪ್ರತಿಯೊಂದಕ್ಕೂ ಉತ್ತರವನ್ನು ಹೇಳಲೇಬೇಕಾದ ಅನಿವಾರ್ಯತೆನೂ ಅವರಿಗಿದೆ.
ಜಮಾಅತಿನ ಅಧ್ಯಕ್ಷರಾದವರ ಮೇಲೆ ಹಲವು ಜವಾಬ್ದಾರಿಗಳೂ ಇರುತ್ತದೆ.
ಅದನ್ನು ನ್ಯಾಯಯುತವಾಗಿ ನಿಭಾಯಿಸಬೇಕಾದದ್ದು ಅವರ ಕರ್ತವ್ಯವೂ ಆಗಿರುತ್ತದೆ.  ಜಮಾಅತಿನ ಅಧ್ಯಕ್ಷತನ ಅನ್ನುವುದು ಅರ್ಹತೆಯ ಮೇಲೆ ಆಯ್ಕೆಯಾಗಬೇಕಾದದ್ದು . ಆದರೆ ಇಂದು ಪ್ರತಿಯೊಂದು ಜಮಾಅತ್ ಕಮಿಟಿಗಳಲ್ಲೂ ಪ್ರತಿಷ್ಠೆ ಗಳು ತಾಂಡವಾಡುತ್ತಿದೆ.
ಶ್ರೀಮಂತಿಕೆಯ ಮುಂದೆ ಮಾತುಗಳು ಮೌನವಾಗುವಾಗ ನ್ಯಾಯಗಳು ಮರೀಚಿಕೆಯಾಗುಷ್ಟರ ಮಟ್ಟಿಗೆ ಪರಿಸ್ಥಿತಿಗಳು ತಲೆದೋರಿ ನಿಂತಿದೆ.

ಮುಸ್ಲಿಂ ಸಮುದಾಯದ ನಡುವಿನ ಅದೆಷ್ಟೋ ಜ್ವಲಂತ ಸಮಸ್ಯೆಗಳು ಸಮುದಾಯದ ಅಭಿವೃದ್ಧಿಗೆ ಮಾರಕವಾಗುತ್ತಿರುವಾಗ ಜಮಾಅತ್ ಕಮಿಟಿಗಳು ತಮ್ಮ ತಮ್ಮೊಳಗಿನ ಪ್ರತಿಷ್ಠೆ ಗಳನ್ನು ಬೆಳೆಸುವ ಚಿಂತನೆ ನಡೆಸುತ್ತದೆಯೇ ವಿನಃ ಜಮಾಅತಿನಲ್ಲಿರುವ ಬಡವರ ಸಮಸ್ಯೆಗಳಿಗೆ ಸ್ಪಂದಿಸುವ ಮನಸ್ಸು ಮಾಡುತ್ತಲೇ ಇಲ್ಲ.

ಮದ್ರಸಾ ಅಧ್ಯಾಪಕರು ಮಕ್ಕಳಿಗೆ ಮೌಲ್ಯಯುತ ಶಿಕ್ಷಣ , ಧಾರ್ಮಿಕ ಶಿಕ್ಷಣವನ್ನು ನೀಡಿ , ಊರಿನ ಜನತೆಗೆ ಒಳಿತಿನ ದಾರಿಯನ್ನು ಪರಿಚಯಿಸಿಕೊಡುವುದರ ಮೂಲಕ ಊರನ್ನು ಧಾರ್ಮಿಕತೆಯ ಕೇಂದ್ರವನ್ನಾಗಿಸಲು ಸದಾ ಪ್ರಯತ್ನಿಸುತ್ತಿರುವವರಾಗಿದ್ದಾರೆ.
ಹೋಟೆಲ್ ಕೆಲಸದಲ್ಲಿನ ಕ್ಲೀನರ್ ಗೂ ದಿನವೊಂದಕ್ಕೆ ಐನೂರರಿಂದ ಆರುನೂರು ವರೆಗೆ ಸಂಪಾದನೆ ಸಿಗುವಾಗಲೂ ಬಹುತೇಕ ಮದ್ರಸಾ  ಅಧ್ಯಾಪಕರು ತಮ್ಮ ಕುಟುಂಬದ ದಯನೀಯ ಪರಿಸ್ಥಿತಿಯನ್ನು ಲೆಕ್ಕಿಸದೆಯೂ ಈಗಲೂ ತಿಂಗಳೊಂದಕ್ಕೆ ಜುಜುಬಿ ಒಂಭತ್ತು ಸಾವಿರದಿಂದ ಹತ್ತು ಸಾವಿರ ರೂಪಾಯಿ ಸಂಬಳಕ್ಕೆ ದುಡಿಯುವವರಿದ್ದಾರೆ.
ಹಲವು ಜಮಾಅತಿಗರು ಅವರನ್ನು ದುಡಿಮೆಯ ವಸ್ತುಗಳನ್ನಾಗಿ ದುಡಿಸುವವರೂ ಇದ್ದಾರೆ.
ಅವರಿಗೂ ಒಂದು ಕುಟುಂಬವಿರುತ್ತದೆ. ಅವರ ಮಕ್ಕಳಿಗೂ ಶಿಕ್ಷಣ ಕೊಡಬೇಕಾಗುತ್ತದೆ. ನಾವು ನೀಡುವ ಸಂಬಳದಿಂದ ಇದು ಅವರಿಂದ ಸಾಧ್ಯವಾಗಬಹುದಾ ಅನ್ನುವ ಚಿಂತನೆಯನ್ನು ನಡೆಸಲು ಸಾಧ್ಯವಾಗದ ಹಲವು ಜಮಾಅತ್ ಕಮಿಟಿಗಳಲ್ಲಿ ಈಗಲೂ ಸರ್ವಾಧಿಕಾರದ ವರ್ತನೆಗಳು ನಮಗೆ ಕಾಣಿಸಲು ಸಾಧ್ಯವಾಗುತ್ತದೆ.

ಉಸ್ತಾದರು ಜಮಾಅತ್ ಕಮಿಟಿನ ಪರವಾಗಿರಬೇಕು. ಅನ್ಯಾಯದ ವಿರುದ್ಧವಾಗಿ ಮಾತನಾಡಬಾರದು.
ಜಮಾಅತ್ ಕಮಿಟಿಯವರು ಹೇಳಿದೆಲ್ಲವನ್ನೂ ಅದರ ಸಾಧಕ ,ಬಾಧಕಗಳನ್ನು ಚಿಂತಿಸದೆ ಕೇಳುತ್ತಿರಬೇಕು ಅನ್ನುವ ವಿತಂಡವಾದಗಳನ್ನು ಮಂಡಿಸುವ ಹಲವು ಜಮಾಅತ್ ಕಮಿಟಿಗಳು ನಮ್ಮ ಸಮುದಾಯದ ನಡುವೆ ಇದೆ.
ಒಂದು ವೇಳೆ ಅದಕ್ಕೆ ತದ್ವಿರುದ್ಧವಾಗಿ ವರ್ತಿಸಿದರೆ ಅವರನ್ನು ಮನೆಗೆ ಕಳುಹಿಸುವ ಜಮಾಅತ್ ಕಮಿಟಿಯವರಿಗೆ ನಮ್ಮಲ್ಲೇನು ಕೊರತೆಯಿಲ್ಲ.

ಇಂದು ಹಲವು ಉಸ್ತಾದರು ಜಮಾಅತ್ ಕಮಿಟಿಗಳಲ್ಲಿನ ಅನಾಚಾರ, ಊರಿನಲ್ಲಿ ನಡೆಯುವ ಅನಿಸ್ಲಾಮಿಕತೆಯ ಕುರಿತು ನಿರ್ಭೀತೆಯಿಂದ ಮಾತನಾಡುತ್ತಾರೆ. ದೀನನ್ನು ನಿರ್ಭೀತಿಯಿಂದ ಹೇಳುವ ಧೈರ್ಯವನ್ನು ತೋರುತ್ತಾರೆ. ಇನ್ನು ಕೆಲವರು ಜಮಾಅತ್ ಕಮಿಟಿಯವರನ್ನು ಭಯಪಟ್ಟುಕೊಂಡು ತಪ್ಪನ್ನು ಕಂಡೂ ಕಾಣದವರಂತೆ ವರ್ತಿಸುತ್ತಿದ್ದಾರೆ.
ಉಸ್ತಾದರೇ.. ನೀವು ಕಲಿತ ದೀನನ್ನು ನಿರ್ಭೀತಿಯಿಂದ ಹೇಳುವಂತವರಾಗಿ .
ಧನಿಕನು ತಪ್ಪು ಮಾಡಿದರೆ ಆತನ ಪ್ರತಿಷ್ಠೆಯನ್ನು ನೋಡಿ ಮೌನವಾಗದಿರಿ.
ಜಮಾಅತ್ ಕಮಿಟಿಯವರಿಂದ ತಪ್ಪು ನಡೆದರೂ ಅದನ್ನು ಖಂಡಿಸಿ , ಜಮಾಅತ್ ಕಮಿಟಿಯವರ ಹೊಣೆಗಾರಿಕೆಯ ಕುರಿತು ತಿಳಿಸಿಕೊಡಿರಿ.
ನಿಮಗೆ ಕೆಲಸ ಒಂದು ಕಡೆ ಹೋದರೆ ನಾಳೆ ಮತ್ತೊಂದು ಕಡೆ ಸಿಗಬಹುದು.
ಆದರೆ ಸತ್ಯವನ್ನು ಅಸತ್ಯವನ್ನಾಗಿಸುವಲ್ಲಿ ನೀವು ಸಹಕಾರಿಗಳಾಗದಿರಿ.
*ಪ್ರೀತಿಯ ಜಮಾಅತ್ ಕಮಿಟಿಯವರೇ..ಊರಿನ ಮಕ್ಕಳಿಗೆ ದೀನ್ ಕಲಿಸುವ ಉಸ್ತಾದರನ್ನು ನಿಮಗೆ ಬದಲಾಯಿಸಲೇಬೇಕಿದ್ದಲ್ಲಿ  ಅವರನ್ನು ಪ್ರೀತಿ ಪೂರ್ವಕವಾಗಿ ಬೀಳ್ಕೊಡುವಂತವರಾಗಿ‌.*
*ನಿಮ್ಮ ಮಾತಿಗೆ ಸಹಮತ ವ್ಯಕ್ತಪಡಿಸಿಲ್ಲ, ನಿಮ್ಮ ಊಹೆಗೆ ತಕ್ಕಂತೆ ವರ್ತಿಸಿಲ್ಲ ಅಂದುಕೊಂಡು ಅವರನ್ನು ಇಲ್ಲ ಸಲ್ಲದ ಅಪವಾದಗಳನ್ನು ಸೃಷ್ಡಿಸಿ ಕಲಿಸಿ ಬಿಡುವಾಗ ಅವರಿಗೂ ನಮ್ಮಂತೆಯೇ ಇರುವ ಕುಟುಂಬವೊಂದಿದೆ ಅನ್ನುವ ವಾಸ್ತವ ಸತ್ಯವನ್ನು ಮರೆಯದಿರಿ.*
ಅವರಿಗೆ ಇದಲ್ಲದಿದ್ದಲ್ಲಿ ನಾಳೆ ಮತ್ತೊಂದು ಮಸೀದಿ ಸಿಗಬಹುದು. ಒಬ್ಬರ ಮೇಲೆ ಅನಗತ್ಯ ಅಪವಾದ ಹೊರಿಸಿದ್ದಲ್ಲಿ ನಮಗದರಿಂದ ರಕ್ಷೆ ಹೊಂದಲು ತುಂಬಾ ಕಷ್ಟಪಡಬೇಕಾದೀತು.
ಅವರ ಕುಟುಂಬದ ಪ್ರತಿಯೊಂದು ಕಣ್ಣೀರಿಗೂ ಬೆಲೆ ಕಟ್ಟಲೇಬೇಕಾದೀತು ಜೋಕೆ..!!
ಯಾವ ಉಸ್ತಾದರೂ ಕಲಿಕೆ ಪೂರ್ಣಗೊಳಿಸಿ ,ಅಲ್ಲಿಂದ ಬಿರುದು ಪಡೆದು ಬರುವಾಗ ನಾನು ಇಂತಿಂತಹ  ಮಸೀದಿಯಲ್ಲೇ ಸೇವೆ ಮಾಡಬೇಕಾದವನು ಅಂತ ಉದ್ದೇಶವಿಟ್ಟುಕೊಂಡು ಬರುವವರಲ್ಲ ಅದು ನೆನಪಿರಲಿ.
ಮನುಷ್ಯತ್ವವನ್ನು ಅಡವಿಟ್ಟು ನಿಮ್ಮೊಳಗಿನ ಪ್ರತಿಷ್ಟೆಗಳಿಗೆ ಮದ್ರಸಾ ಅಧ್ಯಾಪಕರನ್ನು ಬಲಿಪಶು ಮಾಡದಿರಿ.

✍🏻ಸ್ನೇಹಜೀವಿ ಅಡ್ಕ