ಮಸೀದಿ ರಕ್ಷಣೆಗೆ ಪ್ರಾಣವನ್ನು ಅರ್ಪಿಸಿದ ಕಾಮ್ರೆಡ್ ಕುಂಜಿರಾಮನ್
ಭಾರತದಲ್ಲಿನ ಕೋಮುವಾದಿ ಶಕ್ತಿಗಳ ವಿರುದ್ಧದ ಹೋರಾಟದಲ್ಲಿ ಭಾರತೀಯ ಕಮ್ಯುನಿಸ್ಟ್ ಪಾರ್ಟಿಗೆ ದೀರ್ಘ ಇತಿಹಾಸವಿದೆ. ಸಂಘಪರಿವಾರದ ಕೋಮು ರಾಜಕಾರಣದ ವಿರುದ್ಧ ಸೈದ್ದಾಂತಿಕವಾಗಿ ಬಹಳಷ್ಟು ಸ್ಪಷ್ಟತೆಯೊಂದಿಗೆ ಹೋರಾಟ ನಡೆಸಿದ ಏಕೈಕ ಚಿಂತನೆ ಬಹುಷಃ ಕಮ್ಯುನಿಸ್ಟ್ ಚಿಂತನೆ. ಇದೇ ಕಾರಣಕ್ಕಾಗಿ ಸಂಘಪರಿವಾರಕ್ಕೆ ಕಮ್ಯುನಿಸ್ಟರನ್ನು ಕಂಡರೆ ಅಗಾಧವಾದ ಸಿಟ್ಟು. ಕೇರಳದಲ್ಲಿ ಇರಬಹುದು ಅಥವಾ ದೇಶದ ಇತರ ಯಾವುದೇ ಮೂಲೆಗಳಲ್ಲಿ ಸಂಘಪರಿವಾರದ ಮತೀಯ ರಾಜಕಾರಣದ ವಿರುದ್ಧ ಶಸಕ್ತವಾಗಿ ಎಡಪಂಥೀಯರು ಹಾಗೂ ಕಮ್ಯುನಿಸ್ಟರು ಹೋರಾಟ ನಡೆಸಿದ್ದಾರೆ. ದೇಶದಲ್ಲಿ ಅಲ್ಪಸಂಖ್ಯಾತ ಮುಸ್ಲಿಮರನ್ನ ಸಂಘ ಪರಿವಾರ ತಮ್ಮ ದ್ವೇಷ ರಾಜಕಾರಣದ ಭಾಗವಾಗಿ ದಮನಿಸಲು ಆರಂಭಿಸಿದಾಗ ಅದರ ವಿರುದ್ಧ ಧ್ವನಿ ಎತ್ತಿದವರು ಕಮ್ಯೂನಿಸ್ಟರು ಎಂಬುವುದು ನಾವು ಅರಿತುಕೊಳ್ಳಬೇಕಾದ ಸಂಗತಿ. ಇಂದು ಮುಸ್ಲಿಂ ಮೂಲಭೂತವಾದಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ಕಮ್ಯುನಿಸ್ಟರನ್ನು ಮುಸ್ಲಿಂ ವಿರೋಧಿಗಳೆಂದು ಕೇರಳದಲ್ಲಿ ಮುಸ್ಲಿಮರನ್ನು ಮುಸ್ಲಿಮ್ ಎಂಬ ಕಾರಣಕ್ಕಾಗಿ ಹತ್ಯೆ ಮಾಡಿದರೆಂದು ಹಸಿ ಸುಳ್ಳುಗಳನ್ನು ಹೇಳುವ ಮುಸ್ಸಂಘಿಗಳ ಹಿಂದಿನ ಉದ್ದೇಶ ಅರ್ಥವಾಗದ ವಿಚಾರ ಏನಲ್ಲ. ನಾನೊಬ್ಬ ಸಾಮಾನ್ಯ ಮುಸ್ಲಿಮನಾಗಿ ಹಾಗೂ ಎಡಪಂಥೀಯ ಹಾಗೂ ಕಮ್ಯುನಿಸ್ಟರನ್ನು ಗಮನಿಸುತ್ತಿರುವ ಓರ್ವ ವ್ಯಕ್ತಿಯಾಗಿ ಒಂದು ಸಂಗತಿಯನ್ನು ನಿಮ್ಮ ಮುಂದೆ ಇಡಬಯಸುತ್ತೇನೆ. ಅದು 1971 ನೇ ಇಸವಿ. ಕೇರಳದ ತಲಷೇರಿ ಎ೦ಬಲ್ಲಿ ಭೀಕರ ಕೋಮು ಗಲಭೆ ನಡೆದಿತ್ತು. ಸ೦ಘಪರಿವಾರ ಹಾಗೂ ಮುಸ್ಲಿಮರ ನಡುವೆ ನಡೆದ ಈ ಕೋಮು ಹಿಂಸೆಗೆ ಅಮಾಯಕರು ಬಲಿಯಾಗುತ್ತಿದ್ದರು. ಕೇರಳದ ಕಣ್ಣೂರು ಜಿಲ್ಲೆಯಲ್ಲಿ ಕೋಮು ದಳ್ಳುರಿಯನ್ನು ಶಮನ ಮಾಡಿ ಜಿಲ್ಲೆಯ ಎರಡು ಸಮುದಾಯಗಳ ನಡುವೆ ಶಾಂತಿ ಸ್ಥಾಪನೆ ಮಾಡುವ ನಿಟ್ಟಿನಲ್ಲಿ ಪಿಣರಾಯಿ ವಿಜಯನ್ ( ಇಂದು ಇವರು ಕೇರಳದ ಸಿಎಂ ) ಹಾಗೂ ಸಂಗಾತಿಗಳು ಶ್ರಮಿಸುತ್ತಿದ್ದರು. ಇದೇ ವೇಳೆ RSS ಕಾರ್ಯಕರ್ತರು ತಲಷೇರಿಯ ಮಸೀದಿಯೊಂದಕ್ಕೆ ದಾಳಿ ಮಾಡಲು ಬ೦ದಿದ್ದರು. ಆ ಸ೦ಧರ್ಭದಲ್ಲಿ ಪಕ್ಷದ ಸೂಚನೆಯ೦ತೆ ಮಸೀದಿಯ ರಕ್ಷಣೆ ಹೊಣೆ ಹೊತ್ತು ಸ೦ಘಪರಿವಾರದ ಗೂಂಡಗಳನ್ನು ಎದುರಿಸಿ ನಿಂತಿದ್ದು ಪಿಣರಾಯಿ ವಿಜಯನ್ ಹಾಗೂ ಸ೦ಗಾತಿಗಳು. ಈ ವೇಳೆ ಆರ್.ಎಸ್.ಎಸ್ ಮತಾಂಧರ ದಾಳಿಯಿಂದ ಮಸೀದಿಯನ್ನ ರಕ್ಷಿಸೋ ಸಂದರ್ಭದಲ್ಲಿ ಕಾಮ್ರೇಡ್ ಯು.ಕೆ. ಕು೦ಜಿರಾಮನ್ ವೀರ ಮರಣವನ್ನಪ್ಪಿದ್ದರು. ವಾಮಪಂಥೀಯರಾಗಿಯೂ ಒಂದು ಅಲ್ಪಸಂಖ್ಯಾತ ಸಮುದಾಯದ ಧಾರ್ಮಿಕ ಕೇಂದ್ರವೊಂದರ ರಕ್ಷಣೆಗಾಗಿ ತನ್ನ ಪ್ರಾಣವನ್ನೇ ಅರ್ಪಿಸಿದ ಕಾಮ್ರೆಡ್ ಕುಂಜುರಾಮನ್ ಬಲಿದಾನವನ್ನು ನಾವೆಲ್ಲಾ ಸ್ಮರಿಸಬೇಕಿದೆ. ಇಂತಹಾ ನೂರಾರು ಉದಾಹರಣೆಗಳು ಕಮ್ಯುನಿಸ್ಟರ ಚರಿತ್ರೆ ಅಧ್ಯಯನ ಮಾಡಿದ್ರೆ ಕಾಣಸಿಗುತ್ತದೆ. ಕಮ್ಯುನಿಸ್ಟರು ಎಡಪಂಥೀಯರ ಬಗ್ಗೆ ಭಿನ್ನಾಭಿಪ್ರಾಯ ಇರಬಹುದು ಅದೇನೂ ತಪ್ಪಲ್ಲ. ಆದ್ರೆ ನಾಲಗೆಯ ತೆವಲು ತೀರಿಸಲು ಹಸಿ ಸುಳ್ಳುಗಳನ್ನ ಹರಿಯಬಿಡುವ ಮುಸ್ಲಿಂ ಮತಾಂಧರ ಶಕ್ತಿಗಳ ಒಳಹುನ್ನಾರವನ್ನು ನಮ್ಮಂತಹಾ ಸಾಮಾನ್ಯ ಮುಸ್ಲಿಮರು ಅರ್ಥೈಸಿಕೊಳ್ಳಬೇಕಾಗಿದೆ.
ಅಬೂಬಕ್ಕರ್ ಮಂಗಳೂರು
Comments
Post a Comment